高盛證券前盤房主管施家文（Morgan Sze）另起爐灶新成立嘅對沖基金Azentus Capital，早前獲證監會批出第9類（資產管理）牌，聽聞基金規模有成10億美元，最快喺第二季推出。尋日絲絲有新發現，Azentus Capital加入兩名猛將Roger Denby-Jones及馮靜怡任董事，公司註冊處資料顯示，新公司個竇設喺中國工商銀行大廈，睇嚟距離大展拳腳之日不遠矣。
睇番證監會網頁，Roger Denby-Jones已經係Azentus Capital六名負責人員嘅其中之一。Roger Denby-Jones今年46歲，早前有消息話佢將出任新公司嘅營運總裁（COO），故出任董事亦係順理成章；事實上，佢與施家文嘅投資理念相近，走埋一齊並唔出奇。
施家文比Roger Denby-Jones更年輕，今年只有45歲，佢喺九三年加入高盛，曾經係全球最高收入交易員之一，○六年度收入高達一億美元，較高盛舵手布蘭克費恩仲多逾一倍。
余絲韻