港股本周一開始加時，咁啱撞正市靜兼跌市，成交不升反跌，可謂生不逢時。經紀聲音多多，有啲抱怨「悶到瞌眼瞓」，有啲仲誇張到話「唔見時間仲慘過唔見錢」喎。港交所（00388）行政總裁李小加尋日出席證券學會午宴時，被問到加時呢4日嘅成效，佢就即時解圍話：「4日唔食飯就話耐啫，加時4日就講成效，實在太早嘞！」呢一下「四両撥千斤」，完全表現出佢嘅急才，並即時博得全場掌聲。
李小加之後就話，加時對市場嘅影響仲要更多時間觀察，但呢個係大趨勢，尤其係未來如想吸引內地投資者來港及QDII嘅資金等，香港金融市場嘅基建設施就必須要進行調整，以適應內地投資者，否則日後就難以繼續吸引內地投資者來港。
全世界嘅交易所都講合併，最新嘅係東京及大阪交易所，李小加話合併潮未完，但就覺得港交所依家根本冇能力，亦冇興趣經營一家海外交易所，又或建立一個龐大嘅交易所王國，港交所只希望喺資產類別及流動性等方面取得進展。
余絲韻