市場熱線：維達估值唔算貴

不過，恒指依家睇好同睇死都未係時候，喺業績放榜期表現衰極有限，連李寧（02331）都連炒兩日業績，成績表只係反映「舊時」，股價係睇前景，李寧就算舊年業績唔差，但前景卻相當一般。績優股呢排多人炒，好似中交建（01800）、勝獅（00716）同保誠（02378）均勁升，但炒業績好蝦人，條數可左調右撥，真實情況要幕後人士至知。

「歐豬」問題又重燃

「狂人」出到最後絕招，話要炸石油設施一鑊熟，今日沙特定為「憤怒日」將有大型示威，人哋憤怒、我哋就恐慌，執筆時標普期貨跌8點，但本港期指則掉頭高水26點。歐洲係另一個火頭，前晚葡萄牙賣國債反應差，西班牙又畀穆迪「降呢」，如歐洲真係下個月加息，「歐豬」更加頭痕，唔加息又怕通脹，點算？

祖國尋日公布外貿數據，出口僅增長2.4%，呢啲數字嘅反覆程度真係嚇死人，舊年下半年好到你唔信，點知依家又嚇你一驚，貿易變逆差73億美元，前排易綱話貿易順差谷起通脹，依家逆差咪得其所哉？而人仔升值壓力亦會減輕。出口差但進口強勁，對碼頭股同航運股影響唔算大，「貓貓狗狗」（01199）尋日更逆市升4.7%。

依家內需股氣氛好咗好多，一來阿爺話會提高免稅額，二來銀監會撤銷細錢莊嘅差別存款準備金率，反映緊縮得嚟又有啲鬆動，三來今日公布嘅CPI傳會輕微回落。尋日好多內需股都逆市上升，包括3隻台資食品飲料股，前排幾樣食品飲料都有得加價，反映過完年之後調控力度冇咁緊。

短炒長揸皆合適

內需股當中，恒安（01044）同維達（03331）係有福同享、有難同當，兩間公司如無意外舊年業績都會幾靚仔，但亦好多人擔心紙漿價格貴會影響今年毛利率，廁紙呢樣嘢雖然冇咗佢唔得，不過廁紙加價未至嚴重到會影響民生。

維達由11蚊樓上跌到7蚊樓下，如反彈番跌幅嘅一半，即係可重上9蚊，但隻股呢幾日升到8蚊已好似冇乜力。之但係，基於內需股由「衰」變番「需」，維達十幾倍PE唔貴，等派業績表前後應有機會見9字頭，但短線又不可太貪心，皆因到20倍PE以上就可能腳軟。

維達今年會積極擴產，亦會進軍衞生巾同紙尿片市場，淨係計祖國孖屐嘅自然增長已經有長線投資價值。題外話係祖國愈來愈多人建議放寬一孩政策，咁重大嘅決策肯定有排傾，但內需股隨時多一個增長動力。

戰報

易寶（08086）+31%

易寶尋日最高炒上1.4元，古晨早於上周四已(目及)實，於當日低位1.07元上車，最多勁賺近31%！

高寶綠色（00274）+24%

桃桃周三話高寶綠色可短炒，又畀佢貼中，以當日低位0.109元，昨高位0.135元計，賺近24%。

古勝