一早攞咗牌，以紐約為基地嘅大型對沖基金D.E.Shaw德劭基金，搵咗招商集團前董事長秦曉加入佢哋嘅中國顧問委員會，唔使估都知係睇中佢喺中國金融領域經驗豐富，人脈廣博嘅優勢喇。
秦總係英國劍橋大學經濟學博士，十幾年前佢喺中信集團做副董事長時，提出要將中信打造為金融控股公司，喺建立中信金融業務方面應記一功。家陣佢係博源基金會理事長，呢個基金會嘅猛人包括兩位副行長吳曉靈及易綱、金管局前總裁任志剛以及梁愛詩等。
德劭喺○七年攞咗證監會嘅第九類牌照，之後再攞埋第一類牌照，已合資格喺香港買賣證券及從事資產管理業務。據講喺執行委員會內，最年輕嘅Julius Gaudio喺去年秋季已將辦公室搬咗嚟香港。