絲絲講場：梁太：湊B難過做CEO
今日係國際婦女節一百周年，恒生（00011）CEO梁高美懿講咗一段好切合女性嘅故事。話說喺廿幾年前，女兒剛出生，梁太放咗5個半月產假，一度諗過放棄工作，留喺屋企做「湊仔婆」，結果喺朝夕餵奶、換尿片嘅日子裏，佢發覺仲難過做行政人員，可想而知，家中嘅老婆、阿媽至係社會棟樑。
梁太自認係幸運兒，唔係綁住揹帶，一邊顧小孩、一邊彎住身車衫嗰種女工，不過佢喺八五年被滙豐派去澳洲工作嗰幾年都經歷好大掙扎，最後決定「一拖二」，將兩個女都帶到澳洲。梁太話：「如果當年繼續留在家裏，今天的我會怎樣了？」
重要崗位能者居之
事隔咁多年，佢係滙豐首位華人女總經理，仲係全港恒指成分股公司嘅第一個以及唯一一位女CEO，不過佢就好感嘆咁話，見到好多女同事因要照顧屋企，寧願選擇唔升職，又或者30歲左右就退休全職做主婦，甚至係為咗專注事業而選擇獨身。
恒生依家嘅員工男女比例係4比6，喺15名董事中，有4人係女士。好多人提起梁太，總愛形容佢係恒生首位女CEO，梁太就但願日後再無「男CEO」及「女CEO」嘅分別，重要崗位，有能者居之。
講咗咁耐，唔好以為女人喺三八婦女節就惡晒，學梁太話齋，男女各有長短處，若兩性之間互相配合，發揮團隊精神，喺家庭或事業上定能加倍成功。所以佢想趁機會向一班姊妹致敬之餘，仲希望大家以後不分性別，真正做到「和諧共融」。