市場熱線：兗煤買定有着數

至於食晏時間有個半鐘尚算勉強，但仍安排咗兩間公司喺期間派成績表，例如建滔板（01888）全年賺多38%睇落好似好正，但下晝股價竟然比上晝跌咗超過7%，好多時魔鬼盡在細節中，如果趕住食飯冇時間詳細睇業績報告，散戶變咗好蝕底，所以古勝建議港交所不如中午時段取消發重要消息通告。不過，如果中午活動大部分取消嘅話，所有業績公布、記者會、推廣會集中晒喺下晝四點之後，記者同分析員肯定分身不暇，尤其呢排放榜期，新股「春眠」之後排隊上市，搞到踢晒腳。

A股開始有牛氣

講番尋日市況，不利因素係ADR下跌、國際油價升到106美金、標普期貨跌5點，好消息就係兩會過後A股升接近2%，滬綜指差4點就可重上3,000點大關，但港股跟外圍唔跟祖國，收市跌95點報23,313點，但期指轉高水6點，扣埋藍籌除息其實係大高水，H股期貨亦高水50點，究竟係唔係暗示美股會有轉機呢？不過，歐股係跌緊，希臘被穆迪連降3級，西班牙畀惠譽降咗評級展望，但依家「歐豬」已經少人理，個個睇住利比亞局勢，大戶可能趁住視線轉移嘅時候乘機「剝牙」。

兩會開完其實冇乜特別，控制樓價、物價、通脹屬老生常談，但係A股就好牛，竟然有內地證券行唱滬綜指會升上萬點，簡直係十畫未有一撇。當然，孖屐博大霧嘅人好多，一唔覺意博中就揚名立萬。呢排博A股好過博港股，恒指仍係上落市格局，滬綜若升穿3,000點有機會發圍，覺得A50（02823）溢價太高嘅話，可考慮滬深300（02846）。

煤價受惠油價飆

A股尋日最犀利係煤炭股，神華（01088）、中煤（01898）同兗煤（01171）嘅A股全部漲一成停板，反觀H股3隻升幅分別只係3.19%、1.94%同1.86%，真係差天共地。睇開此欄嘅股友都知道，古勝不嬲都係煤炭股嘅大好友，油價升到每桶106美金，煤炭作為石油嘅替代品，自然水漲船高，所以煤炭股上升亦理所當然。另外，澳洲昆士蘭水災，搞到焦煤價格突破每噸340美金，鞍鋼（00347）同馬鋼（00323）都跌超過3%。

煤炭股勝在平平穩穩，除咗中煤差啲之外，神華同兗煤都回升至各條平均線樓上，福山能源（00639）前禮拜五更突然大升，然後只係略為回軟，隨時有好消息。如果覺得煤價可隨油價上升嘅話，第一隻考慮嘅仍係兗煤，皆因公司以賣現貨煤為主，聽講利比亞有排打，儲定啲油股同煤股當做對沖都好，兗煤繼續係老古中長線選擇。

戰報

蒙古投資（00402）+25%

古晨尋日推介嘅蒙古投資發威，一度脫離仙班，炒上高位0.106元，吼中於低位0.085元上車，勁賺近25%。

海爾電器（01169）+13%

海爾連日由低位反彈，上周三畀小尾貼中，跟佢於當日低位7.4元上車，昨高見8.4元，最多可賺超過13%。

古勝