孖妹缸湖遊：加時交易多炒多賺？

提早落行備戰開市

港股交易時間長咗，即係話港交所（00388）以及全港散戶要一齊開「OT」，不過大家係咪會有額外嘅「OT」收入，咁就係另一回事喇！其實炒股時間多咗，投資風險自然增加，散戶如果出入唔小心，手痕買多兩、三轉貨，贏到錢就話好啫，若然輸咗就真係「偷雞唔到蝕揸米」喇！其實「加鐘」衍生嘅問題都唔少，3位投資老手就各有應變措施。

曾：「元朗股神」曾錦安

李：「極速短炒王」李國淳

譚：僑豐證券鰂魚涌分行經理、「股仔狙擊手」譚梓業

高妹：「早起的鳥兒有蟲吃」，港股加時，你哋要提早幾點起身準備作戰？

　譚： 我會由9點半提早至9點返到證券行。

　曾： 我本身要返工，平時亦好少落證券行坐，而且自己隨身都袋住部股票機，所以港股幾點開市對我冇影響。

　李： 平時我朝早9點就返到證券行準備10點鐘開市，依家就變咗要8點半返到去囉。

市旺先會走多幾轉

祺祺： 其實港股「加鐘」，啲人話散戶可走多幾轉，即係話賺錢機會變相大咗？

　譚： 以前A股比港股早開市，本港散戶可以先掌握A股開市後嘅方向，然後進行相關投資部署，但依家兩地股市同步開市，散戶變相少咗頭15分鐘嘅獲利「走盞位」。至於個人係咪會走多幾轉？其實好睇市況，市好嘅時候我平均炒3轉，市靜咪炒一轉囉，時間長短唔會影響買賣次數，市況好壞就有影響喇。

　曾： 我認為「加鐘」都係順應國際股市交易時間標準，但就唔認同買賣時間多咗，港交所及散戶嘅收入會同步增加嘞。以賽馬為例，本來一日有10場賽事，後來增加至12場，馬迷嘅投注額可能會輕微增加，但大部分馬迷就會諗，橫掂多咗兩場賽事，咁即係可以遲啲先至入場買馬喇，意思即係交易次數唔一定會大增囉。

　李： 我好短線，依家每日出入大概合共15轉，盡可能做到每日唔留貨過夜。港股「加鐘」唔代表個市會變得好炒咗，如果市況冇波幅而成交又少，你再加多20個鐘畀我都係冇用。

執平貨要識「睇位」

高妹：咁港股提早開市，你哋掃貨時間會有變動嗎？

　譚： 炒股最重要係識得「睇位」，根據個人觀察，通常早上11點半以及下午3點半都會有較多斬倉盤出現，令到股市及股價波幅擴大，而我多數就會喺呢兩個重要時段做好買賣部署。不過「加鐘」之後，斬倉時段會唔會有所改變，咁就先要靜觀其變喇。

　曾： 我通常會喺早上10點半至11點，以及收市前半個鐘做好買盤，趁波幅足夠時去執平貨。

　李： 我主力炒細價股，買貨時間冇分上午或下午，總之見到某個時段，個市突然炒起邊啲板塊，我就會即刻跟進，賺幾格即沽貨獲利。

波幅收窄不利炒輪

祺祺： 成日聽到你哋講波幅，究竟「加時」後，股市嘅波幅會大咗抑或細咗？

　譚： 大市嘅波幅應該會細咗。就以基金盤為例，若基金經理要沽貨，本來佢要沽100萬貨嘅，但交易時間長咗，令到買賣雙方都唔心急去做嘢，盤價唔會加碼，但拖慢時間沽貨就會令某隻股票價格由本來郁得好激變為平淡。窩輪方面，若正股波幅細咗，窩輪波幅自然會縮，呢個時候窩輪就唔好炒喇。大市波幅變平，對炒即日鮮嘅散戶就唔太好喇，因為股價升跌又會受到局限，令獲利空間減少。反而對於炒中長線嘅散戶就影響唔大，佢哋會覺得今日冇乜波幅，股價又升咗一趟，咁每日咪好開心囉。

　曾： 其實窩輪市場最受歡迎嘅，就係嗰4隻「師奶控股」––滙控（00005）、中移（00941）、國壽（02628）及中行（03988）。當大市波幅變平，呢啲窩輪都會有些少影響嘅！

　李： 講真吖，如果個市太波動或者好平靜，炒窩輪就等於想去自殺。正如我都會跟「冧巴」去炒股，不過我都有思考及判斷能力，唔係人哋寫出嚟我就跟買，真係當我係傻嘅咩？

聽完3位股壇老手發表對「加鐘」嘅意見後，印證咗一個非常現實嘅情況，就係「加鐘」唔等於「加錢」。雖然大家成日都聽到「多勞多得」呢句說話，不過現實永遠係殘酷嘅，一命二運三風水，孖妹寄語各位散戶慎防「加鐘」誘惑，炒股都係小心行事為妙。

滙控業績唔掂21%人估跌穿80元

滙控（00005）公布業績遜於市場預期，股價翌日急跌5.1%，作為散戶嘅你認為今年上半年滙控股價走勢如何？據今期《東方產經》網上民意調查，截至上周末晚上6時嘅結果顯示，23.6%散戶認為可以升穿100元，33.8%人估計會徘徊90元水平，21.6%人話會徘徊80元水平，其餘21%人就認為會跌穿80元。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk