市場熱線：金蝶穩中求勝之選

老美嘅就業數據係強心針，股神預計失業率可以回落到7%，經濟好、就業好、樓市好，到時一天都光晒，但年中仲有冇QE3呢？股民又唔係經濟學家，諗得多都多餘，依家搵落後股炒吓最實際。QQ（00700）當然唔係落後股，上周五創咗新高，淨係以祖國互聯網普及率得35%計數，唔知升到幾多先夠皮？大笨象（00005）臨尾都要倒跌，據稱係今個禮拜會降低佔恒指比重有關。

延長交易時段益大戶

今個禮拜最大件事係股民要改變生活習慣，起身早半粒鐘，食飯少半粒鐘。開波頭半粒鐘係黃金時間唔懶得，所謂「早起的鳥兒有蟲吃」，而民以食為天，最多慳番啲吹水時間，但睇漏通告就閣下自誤。今次改時間最得益係大戶，大行有程式買賣，電腦唔使食飯去廁所，C組？話之你啦！

本地零售股炒起，漢登（00448）、JOYCE（00647）、威高（01173）表現最好，話多得鬍鬚曾回水，但老古認為只係藉口，漢登主要市場喺南韓同台灣，去JOYCE買衫嘅唔志在嗰6,000蚊，所以最大嘅原因只係跌得多嘅反彈。不過，內需股氣氛的確好番好多，如果祖國免稅額提高到每月3,000蚊人仔嘅話，月入6,000蚊嘅打工仔可以每月多百幾蚊使，夠買多件衫或出去食一餐。

呢排啲績優股好醒神，好似光國（00257）、信義（00868）、晨訊（02000）呢類等佢派完成績表再撲上車都仲大把水位，不過股民梗係想賺到最盡，所以呢排就快放榜、又預期業績有咁上下嘅股亦有人偷步入市，老古呢排經常提住嘅中建築（03311）升逾5%，潤泥（01313）創咗新高，老古對下周二派成績表嘅金蝶（00268）亦有幾大期望。

軟件股備受國策關照

老古早排已講過對內地軟件業睇好，皆因已出台咗多項利好政策，金蝶已獲批10%嘅稅務優惠，加上祖國改邪歸正支持用正版（即係打擊翻版），軟件股最正路係金蝶，晒士夠大又年年業績對辦，所以有多個芬佬睇起。

話金蝶業績標青好似冇乜根據，因為公司舊年上半年只係賺多18%，坊間預測佢一○年PE係30倍以上，但老古逆向思維，如果公司舊年經營狀況唔好嘅話，何來股價長期硬淨？有芬佬5蚊樓上增持不特止，公司喺舊年尾同今年初亦多次於4.22元至4.48元之間回購，業績隨時會有驚喜。

戰報

維奧集團（01164）+18%

古晨上周五話維奧買盤積極，當日低位0.31元上車，即日已炒高至0.365元，眨眼間就賺18%。

達進精電（00515）+12%

達進精電上周五一度高見3.81元，較古勝上周一推介時低位3.4元，累升超過12%。

古勝