絲絲講場：時富關百良：再加鐘要派叉燒飯
下周一係香港證券界嘅大日子，因為港股交易時段會延長一粒鐘，唔少證券行已經做好準備，希望屆時可以開市大吉，時富金融就係其中之一！
時富證券董事關百良話，交易時段只係延長一小時，而市場嘅資金又咁穩定，估計交投唔會因為「加時」而大升，不過如果將來再進一步延長交易時段，成交就應該會增加喇！佢仲聽到有熟客講笑咁話：「如果再加時，食午飯就好趕，你哋可能要派埋叉燒飯喇！」
提早8點半開舖
佢又話，時富嘅前線員工一向返朝9晚6，依家早咗開市，佢哋就要早啲起身，早半粒鐘返工做準備工夫，而收工時間亦會提早半粒鐘，工時冇加長，咁都好啲！另外，時富為咗方便散戶，屆時證券行喺早上8點半就會提早開門，令散戶可以早啲埋位，睇定股份落盤。
余絲韻