絲絲講場：連敬涵低調過檔富昌
證券界轉工潮浪接浪，繼羅尚沛（Eugene）過檔康宏後，今期就輪到連敬涵（Kingston）做主角，佢喺本月一日已低調咁離開僑豐證券，轉投富昌證券擔任研究部總監一職，但由於仍需時轉牌，所以依家暫當獨立股評人。
Kingston原本喺僑豐擔任業務發展董事，佢話舊公司與新公司嘅工作性質基本上相似，但預計返內地公幹嘅機會多咗，例如要喺內地做講座及研討會等，為新公司開拓內地業務。唔講唔知，原來Kingston喺北京出世，自小就講得一口流利嘅普通話，與內地同胞同聲同氣，所以北上發展對佢完全冇難度，今次富昌真係請啱人！
至於本來係富昌證券代言人嘅總經理藺常念（藺Sir），就會喺本月底離開富昌，加盟一家投資公司。Kingston與藺Sir私交甚深，雖然只係短時間做同事，但都應該好合拍。
鄧聲興加盟AMTD
唔知係咪兔年特別好景，金融界轉工消息此起彼落，有啲仲「升呢」做高層甚或做老闆！好似喺上月小登科嘅鄧聲興就雙喜臨門，由泓福資產管理跳槽到長實（00001）旗下嘅AMTD擔任證券業務部總經理。此外，依家才三十出頭嘅獨立股評人黃偉康，就與嚟自內地及新加坡等地嘅拍檔開設咗投資公司Invest Inc.（IVI）。
余絲韻