新世界（00017）近期頻現人事變動，元老梁志堅（堅叔）嘅總經理一職由越秀交通（01052）前執行董事陳觀展接任，尋日首次出嚟見人；人稱「純官」嘅董事總經理鄭家純就話，未來仲會繼續招攬人才，希望令管理階層可大力革新兼增加透明度，令運作更順暢喎！
元老級嘅堅叔退下火線後，純官就搵咁多人加入，絲絲問佢係咪依家先有空間改變？純官就話唔係，新世界一直都係佢揸Fit㗎喇，不過佢話新世界嘅管理層一直唔錯，不過有時同啲元老嘅想法有啲唔一致，所以為公司加入啲新元素，希望公司發展得更好。至於會唔會繼續增加家族成員入管理層，純官話希望能令公司企業化，唔係家族化，佢嘅宗旨係「有能者居之」，冇特定或指標要邊個家族成員加入。
早前有傳聞話恒隆地產（00101）前執行董事吳士元（Terry）係新世界想搵嘅對象之一，純官就話冇搵Terry，亦冇聽過有同事搵佢，依家佢希望請一啲有物業管理經驗嘅人才。咁人工有幾多？佢就話唔想喺度賣求職廣告喇！
純官同阿仔鄭志明一樣，話唔多滿意財政預算案，認為唔單止解決唔到問題，亦照顧唔到有需要嘅人。雖然係咁講，不過佢唔會參加遊行，話搞到社會咁激會影響社會和諧喎！
余絲韻