港股下周開始加時，輪商亦要提早開工兼加時工作。法興環球股票產品部策略師蔡秀虹（Eva）話要將所有工作調前，同組嘅交易員晨早7點幾就返工，自己最遲喺8點要返到公司，而且可能會一改每朝嘅開會模式，變咗開早餐會，一邊食早餐一邊傾窩輪。
佢話好難估計整體返工時間加長幾多，不過帳面睇就多咗一個鐘，唔知老闆會唔會見佢多咗嘢做，加佢人工呢？
Eva公司喺金鐘，遲啲午飯時間縮短咗，一點半開市就要坐喺公司，想去中環見客一定冇咁方便，所以佢打算改喺放工後Happy Hour與客人飲杯嘢、食晚飯，慢慢傾生意，仲已準備好展開日日叫外賣嘅生活；佢仲笑笑口話，好彩公司附近都幾多好嘢食，同事已做足功課，搜集外賣美食嘅資料。
另外，由於港交所一早已公布咗延長交易時段安排，法興亦準備好網站資料更新嘅安排喇。
余絲韻