絲絲講場:滙控放榜似歡樂滿東華

滙控(00005)尋日公布業績,成績都算好咗,CEO歐智華好得體咁話,每個員工都視CEO為目標,如果做到不論好唔好景都會好自豪,仲話五號仔嘅CEO係銀行界嘅「Amazing job」。

一人一枱電話發問

尋日滙控反傳統以視像形式公布業績,話要追上潮流趨勢喎,仲特登安排咗間房畀傳媒,一人一張枱加埋電話,幾十人就好似歡樂滿東華咁排排坐,睇住大電視直播,仲要鬥快打電話問問題。今次冇人影到相,好在滙控都影番張倫敦三大巨頭嘅相,否則分分鐘要出佢哋張陳年舊照。

不過絲絲要投訴,雖然五號仔今次唔使印咁多份業績,用少啲紙、斬少啲樹,但就搞到成班行家做咗斬樹兇手,個個一人一份,要印成幾百頁嘅業績報告,差啲搞到影印機同絲絲罷工。

唔知係咪畀英國政府話佢哋班高層人工高、福利好,歐智華話以後會公布額外高層嗰啲職務資料。至於以前喺業績會講嘅發展大計,佢講到明話業績會只講業績,策略發展會遲啲講,而據聞會留番五月至講。

余絲韻

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率