內地與香港話就話愈嚟愈融合，但好多做法及用語都有自己嘅一套，與本土文化好有關連，尋日建行（00939）董事會秘書陳彩虹就講咗一個好好嘅例子畀絲絲聽。
話說去年間間內銀都開晒口講集資，港人講嘢好直接，簡而言之就稱呼呢啲行動為「抽水」，點知建行董事長郭樹清話覺得香港傳媒用「抽水」形容集資好負面。好彩香港金融專家任志剛喺去年加入建行做非執董，經任總把口講解吓，郭董明白咗廣東話用抽水形容集資係中性詞，依家已唔介意話自己抽水。
建行成功「抽水」超過600億元，陳彩虹話係去年三大事件之一，另一件大事就係董事局換屆，包括金管局前總裁任志剛加盟。陳彩虹話任總入局後，最大貢獻就係提供風險管理意見，好似內銀將表外資產轉入表內時要留意乜嘢，另外就係向建行提供香港人民幣市場睇法。絲絲認識嘅任總，唔太着重數字多與少，最緊要係啲數字有幾穩陣兼可信，所以集中睇住啲風險就最啱佢，兼且佢對人民幣呢個市場熟到不得了，梗係多嘢講啦。
建行喺本月公布去年業績，陳彩虹已經同大家講定，第三件大事就係建行去年賺咗好多錢，不過實際金額唔講得住，股東們聽到建行賺大錢係去年大事之一，應該都好開心啦。
余絲韻