市場熱線：江銅上升水位不俗

大笨象（00005）同金錢龜（00011）收市後齊齊派成績表，孖屐關心大笨象派息多過賺幾多，結果係順從民意，派息增加到12美仙，但由於盈利只係預期下限，喺英倫股價曾跌四個巴仙，對今日港股唔多唔少都會有影響。大象升咗咁多，加埋業績唔算好，倫敦象已跌到86蚊邊，考驗緊條上升軌支持得住否。

炒業績有辣有唔辣

呢排係成績表定生死，尋日中午已有光大國際（00257）同信義（00868）放榜，兩隻股下晝股價都跟住做好。下個禮拜開始食晏時間減到得個半鐘，顧住食飯又冇時間睇公司業績通告，港交所（00388）咁做法係對散戶唔公平。

成績表固然重要，買賣時機更緊要，好似光匯石油（00933）業績後兩日暴瀉4成，但跟住兩日又升番大半。古勝尋日講真明麗（01868）業績令人認真失望，結果股價即時勁插17%，不過公司自稱今年嘅盈利可以回復到○九年時，信唔信得過冇人擔保，得人驚嘅係應收帳多咗1倍。真明麗唔係話冇得博，但低位較難確認，唔似得光匯喺3.2元係明顯大位，跌穿咗再上番係買入訊號。

浪潮（00596）發盈警，但跌幅仲一度勁過真明麗，公司冇話賺少幾多，只係話研發推廣開支大增，其實最主要原因可能係佢嘅王牌產品稅控收銀機收益大減。前排軟件股炒國策，浪潮都係軟趴趴，已經係「暗病」嘅先/後兆。

老古今年對軟件股幾睇好，因為有稅收優惠、有補貼、中央又的起心肝打擊翻版，但有根有據嘅股始終得隻金蝶（00268），另金山軟件（03888）今年有機會鹹魚翻生。

講起稅務優惠，江西銅業（00358）上個禮拜收到江西省政府通知，失驚無神做咗高新科技企業，由一○年起連續3年只需交15%稅率，老古唔知評定係乜標準，但江銅股東肯定話like，無端端賺多一成幾，呢兩日回升只係約5%其實未盡反映。

當然，銅股冇理由唔睇銅價，倫敦期銅上到每噸10,160美元歷史高位之後，依家回軟番幾個巴仙，但供不應求現象仍然存在，銅價走勢仲算硬淨。江銅嘅銅精礦部分仍要靠入口，但喺內地已係自給率最高，未來兩年銅礦產能將分別升到20萬噸同22萬噸，瑞銀亦將公司目標價由25.85元上調到32.23元，勝在仲有唔少水位。

money18 助你縱橫股壇

古勝又有好介紹，市場訊息千變萬化，要掌握最新市場動態及消息，看官可即上money18.on.cc查閱免費即秒股價及市場資訊；iPhone手機用戶更可透過money18 app獲取最新炒股訊息。此外，打電話聽上日行情電話熱線：27958888，更為閣下提供詳盡的股票報價資料。

戰報

國中控股（00202）+13%

古晨二月十一日推介國中畀大家，當日低位只係1.32元，尋日搶高至1.5元，累升逾13%。

恒芯中國（08046）+22%

恒芯中國尋日抽上高位1.88元，較帥哥二月十四日推介時低位1.54元，累升超過22%。

古勝