孖妹缸湖遊：超級富豪財管傳承關注

「股神」巴菲特嘅投資名言一大籮，如果講到超級富豪最啱睇嘅，我哋就諗起呢句：「建立信譽要20年，破壞信譽只要5分鐘。如果你能想到這點，做事情就會不一樣。」眾所周知，做得超級富豪，佢哋嘅家族版圖一定好宏大，家庭成員咁多，拗撬又點會少呢？

近期瑞銀為進一步擴大對亞太區內超高淨值客戶嘅服務範圍，喺今年一月就設立咗「家族服務部」，該部門主要為亞太區嘅超級富豪提供各方面服務，例如慈善活動、家族顧問、財富規劃及環球保管等。

劉：瑞銀財富管理亞太家族服務部主管劉羽恩

排解大家族財富紛爭

高妹：香港超級富豪唔算少，近期尤其多爭家產事件出現。有時屋企人數目太多，溝通自然困難，你一句佢又一句，好易搞到嘈交收場。

　劉：其實人數愈多，溝通嘅複雜性就會增加。有統計指出，當一個家族發展至第五代嘅時候，其家族人數就會超過100人，加上超級富豪嘅家庭成員會遍布世界各地，而各地嘅經濟及營商環境又唔同，政治考量與稅制都會影響佢哋喺財富上嘅經營。

祺祺：好似炒股票咁，有時候資訊愈多，都會搞到我頭昏腦脹架！如果有人可以幫我收集炒股資訊，然後做埋分析就好喇。

　劉：當問題發生時，身處其中嘅人一定會變得主觀，如果呢個時候有第三者嘅介入，提供比較客觀嘅意見，咁件事就會變得唔一樣。我哋嘅家族服務部除咗協助超級富豪將家族生意保管及增值之外，其中重點就係將財產可以順利咁一代傳一代，減少家庭成員之間嘅各類複雜問題。

代安排商討敏感家事

高妹：不過中國人思想比較保守，佢哋未必肯將啲錢交畀其他人管理喎！

　劉：你講得啱！傳統上，中國人嘅性格比較含蓄保守，家事亦希望盡量保密，以免家醜外傳。不過每個超級富豪始終都要將財富放喺銀行，點樣選擇一家信譽良好又能迎合佢哋需要嘅銀行，呢個先係重點。

祺祺：超級富豪咁有錢，佢哋仲會有乜嘢超級煩惱呀？

　劉：「家家有本難唸的經」，眾所周知，金錢係解決唔到所有嘅問題，當財富處理不當時，金錢反而係製造更多問題嘅源頭。其實超級富豪除咗要面對投資及財富管理嘅問題，另一個重大需要就係如何建立及延續家族聲望，保持家庭成員之間嘅融洽。

高妹：我都好認同，一個人嘅聲譽已經咁重要，更何況係成個家族嘅聲譽。

　劉：要知道，每個家庭都會出現敏感性嘅問題，佢哋未必有人敢直接提出討論，而我哋就可以第三者角色介入，為家族成員安排一個合適嘅時機及地點，令佢哋可以為敏感事情進行商討，一來避免由家人提出問題以致出現「有色眼鏡」嘅疑慮，二來大家溝通後嘅接受程度亦會較高。

分配資產定適當規則

祺祺：有時候輩分唔同，性格又唔同，好多嘢都未必可以放膽拎出來傾！

　劉：其實超級富豪與大家所面對嘅煩惱都係大同小異，最大分別可能只係金額數字上會放大。例如一個超級富豪家族可能有五房人甚至八房人時，當家族生意要派發股息，有啲家庭成員可能較多參與公司營運，有啲可能較少，故分配準則就必須要清晰，以免發生不公平嘅爭執。呢啲問題，都可以透過我哋幫手解決。

高妹：我份糧得一萬幾千就話易分，超級富豪嘅資產以億萬元計，計少個崩都唔得掂喇。

劉：又或者有啲家庭成員唔想再參與家族生意，提出分家嘅要求，咁佢嘅股份應該點樣賣出呢？只可賣番畀自己人，抑或可以賣畀外人呢？牽涉到價值計算，情況就會變得複雜，所以我哋都會擔當家庭成員之間的溝通橋樑，制訂適當嘅規則要佢哋遵守，從而解除各種財富分配嘅煩惱。

貼心服務助維繫感情

祺祺：咁你哋最近有冇幫過超級富豪做嘢呀？

劉：早前有個大家族就搵我哋幫手成立一個慈善信託基金，金額約達10位數字。呢個家族嘅爸爸本身已有做各方面嘅慈善活動，但就冇諗過原來可以全家人一齊參與，所以我哋就先為佢哋安排一個具策略性及效率性嘅講座，透過項目增進家庭成員之間嘅感情。

高妹：超級富豪家族咁大，咁你哋會安排幾多人服務佢哋？

　劉：每個超級富豪都會有一個專責為佢服務嘅客戶經理，令雙方接觸點更為專注，客戶經理嘅背後有整個瑞銀服務平台做支援。以業界而言，普遍上只要你有5,000萬瑞士法郎（約4.2億港元）就可選擇呢個服務。

中東局勢緊張 48%散戶照撈貨

中東緊張局勢升級，拖累全球股市上周二急挫，有分析指利比亞政局不穩屬短期因素，無礙全球經濟復甦。現時你會採取乜嘢股票投資策略？據今期《東方產經》網上民意調查，截至上周末晚上6時嘅結果顯示，14.1%人話會及早沽貨，37.3%人會靜觀其變，48.6%就認為係入市良機。

高妹、祺祺

若有料報畀高妹同祺祺或有嘢問，可電郵money.biz@opg.com.hk