呢排絲絲搭巴士嗰陣，成日見到有個廣告呼籲市民做義工。其實香港好多大企業都有義工隊，恒生（00011）嗰Team義工團仲好有規模添，聽聞去年參加人數及時數分別大增25%，佢哋經常會落手落腳幫啲獨居長者剪頭髮，又或者同啲小朋友做吓手作仔，連去沙灘執垃圾、郊外種樹都做埋。
絲絲參加咗恒生義工團嘅嘉許禮，佢哋話做義工唔單止幫助社會嘅弱勢社群，仲有機會當係家庭聚會，與屋企人、同事一齊服務社會。呢班平日勁忙嘅中環白領，仲肯抽時間去做義工，服務時間近2萬小時，真係令人敬佩。
當日絲絲仲撞到恒生中國副董事長兼行政總裁薛關燕萍，佢話早兩個月先參加咗「上海國際馬拉松」，為貧困兒童籌款。唔知係咪絲絲錯覺，當日見到班義工個個都靚仔靚女，可能做得善事多，人都靚啲。
余絲韻