絲絲講場：羅尚沛過檔康宏證券做CEO
農曆新年過後，金融界嘅「音樂椅」又再啟動，今次主角係財經名嘴羅尚沛（Eugene），佢剛啱由時富過檔康宏，「升呢」擔任康宏證券行政總裁。大家可能會問，康宏本身已有猛人Michael（康宏證券及資產管理董事黃敏碩）坐鎮，依家加埋Eugene，往後究竟邊個負責推介股票？
退居幕後拓內地市場
經絲絲了解後，原來Eugene將會退居幕後，掌管康宏證券嘅日常運作及負責制訂發展策略，康宏亦會依靠佢對內地金融市場嘅熟悉及了解，拓展內地金融市場；因此Eugene話以後接受媒體嘅訪問會慢慢減少，並只會回答有關公司業務事宜，評論港股走勢就免問喇！如果要問聽日個市升定跌，都係要搵Michael囉。
余絲韻