FB（Facebook）人氣急升，創辦人朱克伯格當然勁多人Like！可能風頭勁過龍，朱克伯格近期成為部分人嘅狙擊對象，繼去年被人指控篡奪股權後，佢近日又被懷疑係病態狂迷騷擾，搞到佢要向法院申請禁令，阻止這位狂迷接近佢！
朱克伯格要動用法院禁令阻止狂迷埋身嘅消息，是由專門報道名人消息嘅美國八卦新聞網站TMZ昨日披露，而FB發言人在接受美國NBC查詢時，亦已確認消息係堅料。呢位狂迷自今年一月已不斷透過FB留言、寄信等方式，試圖與朱克伯格聯絡，尋求朱克伯格為他嘅家人提供財政援助，呢種滋擾不斷升級，竟然喺FB話準備為朱克伯格而死，上月更被FB嘅保安人員發現，佢試圖去朱克伯格嘅家中造訪，朱克伯格擔心這位狂迷會對他本人、女友以至家人嘅人身安全帶來威脅，所以向法院申請禁令，阻止這位懷疑病態狂迷喺佢嘅300碼範圍內出現。
呢一位狂徒自辯話，佢只係希望朱克伯格畀意見，幫佢解決一個重大嘅個人問題，又話自己完全無意傷害對方，仲表明會尊重對方嘅私隱！
（余絲韻）