尋日係兔年首個交易日，一如所料紅盤高開，但多數人估到個開頭，卻相信冇乜人估到個結尾，恒指收市急挫355點。
跌市之中，一眾超人家族成員成為亮點，鉑陽（00655）、長江生科（00775）同詩詩日前推介嘅中國木業（00269），齊齊登上升幅榜，升幅介乎7%至8%，相比之下，另一成員中聚雷天（00729）尋日只升唔到2%，大有機會追落後。
其實尋日升幅榜上仲有一隻股票吸引詩詩視線，講嘅就係華潤微電子（00597），去年十一月底曾作推介，當日股價0.35元，目標0.43元，經過兩個多月反覆，尋日終於抵達。
華潤微電子除半導體業務外，目前亦積極拓展節能產品及電動車電池元件業務，可以受惠於「十二五」的相關國策。股價踏入一一年開始突破向上，昨日急升7.6%，收報0.425元，上升軌道已成形，詩詩認為可將目標上調至0.48元，止蝕0.38元。
詩詩