絲絲尋日打畀財經名嘴鄧聲興（Kenny）拜年，Kenny心情勁靚，皆因佢今日小登科做兔新郎，會喺W Hotel筵開廿圍大宴親朋，然後會去泰國度蜜月，過一個溫暖嘅蜜月，下周就返新工，兔年喜事一籮籮，Kenny心情當然靚到飛起。對於再做老襯，Kenny顯得非常開心，絲絲由電話都感受到佢心情靚到無得頂。佢好開心咁話自己鍾意精品式酒店，所以揀左W Hotel擺酒，仲請咗做節目嘅好拍檔做司儀添! 年初六擺酒，唔知Kenny會唔會派埋利是?
Kenny今次揀咗去泰國度蜜月，佢話貪佢夠近喎。查實，Kenny近排轉工去長實（00001）旗下尚乘資產做尚乘資產證券部總經理，不過一直都冇公布確實返工日期。Kenny話，度完蜜月，下個星期返到來就會返工。話時話，Kenny上次拍拖被人影咗做雜誌封面後冇幾耐就轉咗工去泓福資產做執董，今次結完婚就轉去跟超人搵食，睇來Kenny桃花運同事業運都係同樣咁旺。
余絲韻