絲絲講場：花旗盧韋柏識做
經過幾日新年假期，尋日好多人開始開工，打工仔梗係想收番封利是，等新正頭可以拎番個好意頭。花旗香港環球及個人銀行服務行政總裁及總經理盧韋柏（洋名Weber）就識做啦，一早起身，銀行未開門，就殺到去旗艦店同員工拜個早年。
帶財神派金幣朱古力
話晒旺角旗艦店，除咗基本櫃枱服務，仲設有花旗私人客戶服務中心，以及Citigold中心，咁就肯定人多勢眾，所以Weber好醒帶埋財神去，自己就派封開工利是，而財神呢就派吓金幣朱古力，等啲員工可以財源廣進，業績節節上升，個個賺到盆滿缽滿。聽聞Weber仲好落力咁逐層逐層咁，同每個員工祝賀下，有咁嘅老細，員工自然落力啲做嘢。
至於財神呢仲好頻撲咁趕去鰂魚涌太古坊後勤辦公室，一層又一層咁同所有員工拜年，當然唔少得金幣啦，不過係朱古力金幣。絲絲又估唔到佢一早起身，仲可以有氣有力咁行咗9層樓拜年，財神果然係「神」唔會累。
余絲韻