滙豐銀行係其中一間倡議走「綠色」路線嘅企業，即係要對地球友善啲，減少廢物，絲絲最近睇到佢哋嘅用紙量嘅年結，發現佢哋仲有改善空間喎！
佢哋做咗個統計，舊年全年嘅辦公室用紙量，相當於23,552棵樹，比起○九年嘅23,213棵樹，多咗339棵樹，如果再將用紙數量量化，即係用多咗差不多廿噸紙。
絲絲尋日八到，滙豐中心係滙豐咁多個物業中，全港用紙量之冠，去年已消耗12萬令紙（一令係指一疊標準包裝A4紙，標準係500張，12萬令即係約6千幾萬張紙），較○九年多咗四成。至於邊一間分行用紙最多呢，估唔到係總行嘅卓越理財中心。咁有最多當然有最少啦，就係榕樹灣分行，只係用咗1.75萬張紙，比起一年前少咗三成。
今次整體用紙多咗，絲絲估計可能同滙豐業績好轉，做多咗生意有關，都算係情有可原嘅。滙豐其實○八年八月喺旺角旗艦店試行使用電子客戶屏幕，舊年三月仲喺全港100家分行共1,400個櫃台推行，並在四月提升服務後，可以每年支援1,500萬宗交易。想更加環保，作為用家嘅我哋，都要幫吓手嘅。
余絲韻