聽聞今年銀行大班花紅都好和味，少則四千萬花紅，多則億億聲，唔怪得佢哋嘅另一半，生活媲美嗰班乜太物太，住得豪、着就要靚，閒時就要行街Shopping，專買著名設計師嘅靚衫，度假就坐郵輪去加勒比海。但凡事有例外，渣打（02888）CEO冼博德嘅太太就好另類，一啲都唔想過奢華生活，教導子女亦一樣。
冼博德嘅太太Besty Tobin係美籍，嚟自俄亥俄州，佢嘅思維同一般賓架太太好唔同，簡單講就係反傳統，唔知同佢係小說作家身份有冇關係，教仔嘅方法都與別不同。聽聞之前佢個仔畀人打劫咗好多次，但仍然堅持送個仔去公立學校讀書，原因係佢想個仔可以融入個世界，唔好剩係與富豪第二代混熟。
佢哋兩公婆都有共識，唔會揀喺倫敦嘅貴價地段居住，只要住嘅地區企企理理就可以喇，冼博德之前試過大拿拿捐咗300萬花紅去慈善團體，都估到佢哋唔係咁着重物質嘅生活。
英國嘅報章甚至形容佢哋厭惡放縱，所以唔理世俗眼光，以身作則無做大花筒。當好多闊太去加勒比海度假，佢哋就兩公婆帶埋四個仔女，來個本地自駕遊，仲好有益身心咁徒步旅行。
余絲韻