市場熱線：五礦資源家底豐厚

雖然兔年首日收黑兼且睇唔通，但老古仍決定分段入市，並非賭徒性格使然，依家通脹咁高，點都要買股票博一博，但亦要分散投資，部分會放喺人仔定存收息，部分買REITs，但老古唔打算買金。

國指跌逾2%仲差過恒指，成分股得江銅（00358）一隻冇跌。依家好似一江春水向美流，老美呢排經濟數據咁強勁，所以好多人認為樓市亦快見底，同花旗樓市息息相關嘅創科（00669）、敏華（01999）同順誠（00531）等均見逆市上升。

內需股變燙手山芋

金字塔國局勢雖然緩和，但帶來後遺症，其他國家驚住火燒後園，紛紛搶購糧食，勢必進一步刺激糧價，而祖國亦會對糧價同通脹更加肉緊，新年下嘅第一道聖旨係要油企優先供氣畀化肥生產商，睇怕調控喺新春之後未必有咁快鬆動，高估值內需股變成高風險，尋日跌幅較大嘅幾隻中資股竟然係青啤（00168）、北控（00392）同華創（00291），幾隻股睇公仔圖更加係跌穿底，但以上幾隻話晒都係實力分子，低位仍令人心思思，好似國壽（02628）喺30蚊關口有大批勇者排晒隊等買貨，今個月祖國加息幾乎唔使點懷疑，但質低畀你買平貨，又似乎並非大戶嘅作風。

兔年最威係邊個？誠哥由虎年旺到兔年，雖然旗下幾件藍籌都要跟住大市下跌，但細size嘅幾件就成逆市奇葩，尋日升幅榜竟然有4隻同佢有關，包括長江生命（00775）、TOM（02383）、中木（00269）同鉑陽（00566），反而電池股中聚雷天（00729）唔夠電力。

福邦（01041）都要變身做電池股，9億元買新業務，5年保證賺11.2億元，真係咁好搵？而比亞迪（01211）同比亞迪電子（00285）兩母子好似貼錯門神，前者不斷創新低，後者則不斷破高位。

國際銅價創新高，突破每噸1萬美元大關，但江銅收市只係冇升跌，鋁作為較平嘅替代品，中女（02600）仍跌2.4%，不過俄女（00486）就創咗新高。資源股呢排跟唔到國際金屬價格，但仍算硬淨，例如五礦資源（01208），尋日微跌1仙，近月走勢有個小圓底，5蚊關口嘅支持力亦好強，應該會有後着。

誓作海外礦業旗艦

五礦舊年十月用咗144億元向阿媽買下澳洲子公司MMG，可見並非細眉細眼純粹「博炒」，間公司現市值只係162億元，今年計劃再用155億買礦，話明要做五礦集團嘅海外礦業旗艦，做得旗艦點可以冇錢？向孖屣伸手係其中一個指定動作，市況唔好都要頂住，到市況好時就推高股價抽水，如果想做連環抽水，批股後表現更加唔可以差，否則有一次冇第二次。基於公司晒士未來會以倍數增長，睇股價實際過睇PE，五礦已表明心迹要做大做強，所以可以逢低吸納，跌穿5蚊先考慮止蝕。

戰報

中國木業（00269）+12%

詩詩過年前推介隻中國木業，兩日間由0.465元升至最高0.52元，跟到足賺近12%，發個新年財。

啟帆（00646） +12%

桃桃於上周二吼中隻啟帆，尋日逆市呈強，高見0.57元，較推介日低位0.51元，累升接近12%。

古勝