孖妹缸湖遊：黃金十年拾級而上

陸：恒生助理總經理兼私人銀行及信託服務主管陸庭龍

祺祺：過去十年金價按年都錄得正回報，最高嘅一年仲升逾30%，扭轉「十年黃金變爛銅」嘅局面。散戶喺呢十年嘅黃金投資期，對黃金嘅投資興趣係咪高咗？

　陸：我喺二○○○年提議客戶吸納黃金，但佢哋覺得用美元買金蝕息，當時利率有5%至6%，機會成本好重。到○八年金融海嘯前，金價升近900美元，市場開始留意黃金，但因為覺得買期貨煩，蝕息又唔實在，買嘅人依然唔多。金融海嘯後投資者相信全球貨幣變得唔穩陣，黃金才慢慢被視為投資組合中嘅必需品。

海嘯後傾向揸實金

高妹：散戶嘅投資技法點跟時代演變？

　陸：金融海嘯前，好多散戶未能確認金價升勢，為保本買紙黃金（做黃金簿仔），亦會選擇黃金掛鈎嘅結構性產品，以及以實金作抵押嘅黃金ETF（交易所買賣基金），○八年後購買實金嘅投資有明顯增加嘅趨勢。

祺祺：買金礦股係咪好啲呢？

　陸：金礦股表現好睇周期，當金價突然飆升，金礦股升幅通常會跑贏金價，因為企業嘅盈利會因定單增加而提高，但當金價及股價都升到咁上下，金企藏金量又唔會突然多咗，要由金礦低層轉到高層開採，因為雜質較多會推高開採成本，變相影響金礦股盈利表現，並拖慢股份升勢。老人家買紙黃金就比較適合，等於買一隻外幣，回報會跟現貨金升。

高妹：咁又係，實金有交收風險，老人家拎出拎入都唔方便。

　陸：過去十年我都有買實金投資，但數量唔多。除非我哋相信面前有好大危機，好似南北韓真係開戰，或者環球金融系統要崩潰，變成全球恐慌性，投資者先會一窩蜂買實金，但拎住實金可能都只係可以用嚟買船飛同糧食走人。

兔年金價或見千五

祺祺：好多人話美元同黃金一樣有避險功能，所以埃及政局不穩下金價同美匯同步攀升，論國力美國仍然係大國，但聯儲局不斷印銀紙，美元想值錢都難。

　陸：市場預期QE2（次輪量化寬鬆政策）持續，如果措施奏效，而美國經濟復甦力轉強，投資者會將資產重新調配。美國嘅貨幣政策比歐元區清晰，又唔使擔心歐債危機，資金可能會重流美元資產，為美匯帶來支持，令金價轉弱。如果歐債危機惡化呢啲事件發生，會推高黃金等資產價格。 我估兔年金價會先跌後升，依家唔使急追入市住，最高見1,500美元，短線低位為1,280美元，如跌穿，可能會下試1,150美元。

高妹：通脹咁高，你有冇咩抗脹心得？

　陸：我主要都係用外匯投資，當中人民幣比重較大。當市場預期將面臨通脹時，會以黃金抗脹，但當通脹真正降臨，特別係新興市場等政府為控制物價而加息，會提高投資者持有黃金嘅機會成本。

散戶20倍槓桿炒短線

馮：投資黃金的散戶馮先生

祺祺：聽講你玩咗黃金十一年，又從事黃金買賣，好熟悉黃金市場，你自己主要以咩渠道投資黃金？

馮：投資黃金係抗通脹其中一種方式，最近四、五年金價好似突然間醒咗咁，升勢快咗好多，我亦比較積極買賣黃金。二○○○年嗰時我開始從事黃金買賣，第一次接觸黃金就係做倫敦金，依家都係以實金同按金形式投資。買實金需要有較充裕嘅資金，所以我四年前先開始買，會揸得耐啲而持有量亦較少，可以收到金燦燦嘅實物好吸引。至於倫敦金，我通常會做十倍至二十倍槓桿，可能會喺幾日內短線買賣，長線啲嘅都唔會揸多過一個月。以前投資者都係做期金多，近四年多咗人買金礦股，以及金礦股比例較重嘅基金。

金價短期難大升

高妹：金價由二○○一年三百美元唔夠升到依家，你真係好有眼光喎。

馮：我開頭買嗰時，當然估唔到金價會升到咁高，只覺得黃金有國際市場，係吸引嘅投資工具，做倫敦金嗰時如果可以捕捉到十美元嘅金價升幅都幾開心喇！不過，未來幾個月金價應該仲處於反覆期，睇唔到重大消息刺激向上，投資應該比較審慎，除非美國推出新一輪量化寬鬆政策，金價先有望大升。

兔年最看好資源股

虎盡兔來，股民皆想愛股「兔」氣揚眉。兔年你最看好以下哪類股份？據今期《東方日報》網上民調截至上周六晚上六點嘅結果顯示，睇好資源股同內銀股嘅分別有36.8%同17.9%，10.6%人覺得內房股有運行，11.3%人覺得本地地產股會好景，剩番23.4%鍾意內需股。

高妹、祺祺

若有料報畀高妹同祺祺或有嘢問，可電郵money.biz@opg.com.hk