期指觀瀾：突破24040放心建好倉
當人人認定港股虎年「虎頭蛇尾」收場，殊不知在上周三半日市，藉大市成交唔多，淡友以為勝券在握之際，港股來個大反彈，恒指升穿多個阻力，報收23,908點，升426點，睇見大市成交得432億元，好友今次攻勢認真係慳水慳力。
自上周初公布的一月份中國製造業指數意外地放緩，亦係連續第二個月回落，市場已意識到人行的緊縮政策，對冷卻經濟起到一定效果，君可見，一個月上海銀行同業拆息，在假期前快速回落，滬綜指也從近日低位逐級攀升到接近2,800點水平，港股反彈只係遲早之事，只係估唔到好友選擇在長假前的半日市出手。
上周三，期指開出23,649，兩個即市阻力位23,540及23,654，幾乎是不攻而破，尚幸筆者的淡倉已提早收爐，作壁上觀也樂得輕鬆。不過，由技術指標看，收市前一小時，期指從23,830挾到接近全日高位的23,955收市，明顯是由淡倉投降盤主導，中線而言，後市關鍵還在期指24,040的密集阻力上，如果今日成功收復並收於這重要阻力樓上，筆者會更放心再開好倉，謹祝大家兔年橫財就手。
John Mullen