市場熱線：創益不妨趁低收集

在港股休市期間，美股仍係氣勢如虹，已經連升5日，港股今日紅盤高開已係肯定，但ADR只係靠大笨象（00005）頂住，其餘藍籌除中鋁（02600）外全跌，反映年卅半日市狂升426點已提前反映相關因素，二萬四未必咁易衝破。不過，道指萬二點關口好硬淨，A股假期前亦5連升，雖然呢個月加息已無可避免，但大家已預咗冇乜好驚，所以古勝亦部署分段吸納，年頭個市應該唔會差。

今年要諗計抗通脹

好多玄學家話兔年魚缸會先高後低，頭半年仲有QE2，下半年有冇QE3實在難講，就算有亦未必是福。老美失業率兩個月內由9.7%大跌到9%，唔通個QE2真係還魂丹？無可否認，老美猛催谷股市，可以達到歌舞昇平假象，但數據一向為班官服務，QE2出之前的數據有咁衰得咁衰，到QE2實施之後即刻唔同晒，咁樣阿伯同奧巴馬自然臉上貼金。

在下一向短視，就算話我知下個月有股災，今個月可能仍會照舊入市搏殺。不過，股樓咁興旺始終係熱錢作怪，慎防「威人威威不是威」。

國際糧食價格創新高，眾窮國的獨裁領導人有排震，今年乃動盪之秋，一片加風四起，對抗通脹的其中一個方法係買農產品股，一拖（00038）已重上8蚊，中海石化（03983）再升6.6%創埋52周新高。

和黃勢返紅底行列

年卅隻「虎尾腳」認真犀利，幾乎係股都升，只係前排逆市升的股有獲利回「兔」，和黃（00013）又升近5蚊，睇來好快再創新高然後榮升「紅底股」，和黃拆開可能有排拆，下個月佢同長實（00001）持有的祖國收租物業又拆出來做人仔REIT，3厘半至4厘的息率相比其他REITs好似回報較低，但孖屐計埋人仔升值就覺得吸引。

古勝雖然覺得呢隻REIT作為人仔計價股票頭炮，表現肯定唔會差，但單純計收息回報同做2至3年定期差唔多，而且冇人寫包單人仔一定升值。

薄膜技術漸趨成熟

講開超人系，佢哋早排買入鉑陽（00566）CB，顯示對薄膜太陽能技術投以信心一票。舊年薄膜光組件輸晒畀晶硅，淨睇兩類股股價表現就知一二，原因係薄膜技術未夠成熟，客戶寧願用晶硅較為穩定。不過，同保利協鑫（03800）股價一樣，多晶硅價錢已炒到好貴，令到同薄膜價格有一定距離，而且薄膜技術肯定會愈趨成熟，今年生意應該有改善。

薄膜股當中，鉑陽有超人入股肯定有唔少短炒錢衝入，間公司近排更不斷回購，慌死人唔知佢哋抵買。不過，講到龍頭地位，始終係舊年上市的創益太陽能（02468），佢上市後股價浮浮沉沉，截至一○年六月底止年度賺5億人仔，以市值80億銀計往績PE係13倍半。如果認同超人眼光，覺得薄膜光伏上游業務有前景的話，中長線不妨趁低買創益。

戰報

長城汽車（02333）+14%

古晨近日每有佳作，一月二十七日推介的長城汽車，連升多日後雖有小許回吐，但計落都升逾14%。

中國油氣（00702）+6%

桃桃在一月二十八日分析隻中國油氣，指其技術走勢不俗，果然冇介紹錯，現價較推介時低位升逾6%。

古勝