商界大佬日日做到冇停手，長假期對佢哋嚟講係休息嘅重要日子。喺去年九月接任中海油（00883）首席財務官（CFO）嘅鍾華就係典型例子，早前公司發票據，佢試過連續3晚冇瞓，佢話嚟緊會有7日新年假期，只會留喺北京，新年願望係可以日日瞓到「自然醒」先起身喎！
顧名思義，自然醒即係唔使畀鬧鐘、電話嘈醒，自自然然咁瞓醒，諗起都爽！
鍾華又講番佢之前有幾辛苦，話說中海油早前發票據，管理層馬不停蹄去新加坡、倫敦等多個地方做路演，向投資者推介，結果係投資者對票據好受落，熱烈認購，仲超額咗幾倍，由於路演時間較緊張，鍾華話試過連續3晚冇瞓覺，都咪話唔辛苦！之不過反應咁好，管理層都非常滿意，辛苦啲都值得啦！
鍾華開到口話希望日日瞓到「自然醒」先起身，絲絲祝佢心想事成，至少呢7日都唔會打電話騷擾佢啦！
余絲韻