絲絲講場：雅虎送麻雀賀年
互聯網方便咗人嘅溝通，不過從另一角度嚟講，有時反而令大家嘅溝通少咗一份「人氣」，就好似話農曆新年將至，如果人人都只靠上網拜年，新春佳節就肯定少咗一份暖意。網站巨人雅虎（Yahoo!）似乎亦深明此道，絲絲嘅老友最近就收到雅虎香港送嚟一份特別禮物——「Yahoo!麻雀」一副！
「一筒」唔好「甩」錯
呢副「Yahoo!麻雀」喺街上唔會有得賣，事關佢係雅虎香港特別訂製，用嚟送畀合作夥伴及廣告客戶嘅新年禮物，而麻雀除咗麻雀箱嘅設計比較特別，最大特色係隻「一筒」以雅虎嘅「Y!」註冊商標嚟代替，以如果習慣「甩」牌嘅朋友就要有心理準備，唔好以為自己嘅「甩」牌技術退步咗，絲絲都「甩」過呢隻一筒，手感唔錯。
雅虎送出呢副麻雀都有深層意義，就係人與人嘅溝通要以科技及傳統相輔相成。話時話，本身亦係華人嘅雅虎創辦人楊致遠，唔知佢對於麻雀呢門中國傳統國粹有冇興趣呢？
余絲韻