「書中自有黃金屋」，絲絲為咗買間黃金屋，當然會睇書鑽研投資啦！輝立証券董事黃瑋傑最近出咗本名叫《股市是平的》嘅新書，絲絲都有捧場，唔講唔知，少年時代嘅黃瑋傑為咗買股票，足足幫人補習咗3年，然後再加埋多年儲落嘅利是錢，終於喺16歲時買下人生中嘅第一隻股票。
黃瑋傑講講吓突然有感而發，直言「股評人唔易做」，佢笑言自己係「黃師傅」而唔係「黃大仙」，有時股民會「選擇性失聰」或「聽啲唔聽啲」，最後輸錢反而怪責股評人嘅眼光唔準，其實唔多公平。當然佢亦提醒股評人要有認錯嘅勇氣，更要將投資者嘅利益置於個人榮辱之上。
至於新書點解叫做《股市是平的》？佢話喺金融市場全球化背景下，投資眼光唔可以再局限喺香港，所以書中內容會帶領讀者突破思想框框，探索全球化之下嘅各類投資機會，當然亦唔少得揀股法則、實戰策略及其他有用嘅分析工具資料喇。
余絲韻