根據中國網際網絡資訊中心最近公布數據顯示，中國嘅網民人數截至去年年底已經升到接近4.6億名，比○九年增加超過7,000萬名，增幅接近兩成。喺呢個大趨勢之下，內地嘅科網股巨人騰訊（00700）最近公布將會斥資50億元人民幣，用嚟成立騰訊產業共贏基金。呢筆資金主要會用喺物色網絡遊戲、社交網絡、無線互聯網、電子商務同新媒體等產業嘅投資機會。
隨着網絡世界出現愈來愈多嘅嶄新商業模式，騰訊管理層亦意識到企業將來嘅發展都要與時並進，相信佢今次成立共贏基金可以為企業帶來新嘅盈利增長動力。
現時，中國網民裏面擁有「QQ」帳戶嘅覆蓋率接近九成，客戶群主要係35歲以下年輕一代，要吸引佢哋嘅目光，騰訊就需要有更嶄新嘅意念同更出眾服務水平相互配合。
騰訊新成立嘅產業共贏基金可以令集團更及時咁發展具發展潛力嘅網絡商機，而且盡早加以發展同培植，務求可以為公司搵到另一個令盈利快速增長嘅來源。
此外，手機網絡嘅強勁增長亦有望為騰訊業務帶嚟一個新發展浪潮。新華社近日報道，內地手機網民人數已經增加到超過3億人，比○九年增加近7,000萬人，相信呢個咁強勁嘅增長可以維持一段時間。
憑着擁有目前龐大嘅用戶網絡，騰訊要喺手機網絡續領風騷可以話係毫無懸念，相信佢嘅相關業務未來幾年將可以繼續大放異彩，為投資者帶嚟唔錯嘅回報。繼續追蹤！
香港大學電子金融服務榮譽助理教授 徐燦傑