絲絲講場：內地iPhone迷瘋冠全球
早前iPhone喺內地炒到成萬蚊一部，大陸有好多「粉絲」不惜千金都要買到蘋果公司嘅產品，絲絲嘅北京朋友就話，買蘋果公司產品唔單只要有錢，仲要「排長龍」，內地嘅蘋果公司零售商店真係「插針都插唔入」，就算呢排天寒地凍，舖頭未開門都已經有人排隊。
內地銷售料年增兩倍
內地依家有4家蘋果公司零售專門店，兩家喺北京，兩家喺上海，每家都成日人頭湧湧。大家都好想知呢4家舖頭賺幾多，雖然蘋果公司冇公布全球每家零售商店嘅收入，不過財務總監奧本海默早前就好自豪咁話，與全球任何企業嘅分店比較，喺中國大陸嘅蘋果公司專門店，平均嚟講係全球最多人流及最高收入嘅店舖，即係超越埋位於美國曼哈頓第五大道嘅「旗艦店」啦。
蘋果公司今年計劃全球加開40至50家零售商店，當中逾半數開設喺美國以外地區，即使佢哋冇講明會喺中國開幾多家店，但喺早前公布上季業績時，營運總監庫克特別提到，包括中國、香港及台灣嘅大中華地區期內收入急增3倍至26億美元，重申喺明年前於中國開設最多25家分店係「首要任務」。
摩根士丹利分析員休伯蒂估計，隨着蘋果公司推出更多新產品及開設分店，佢哋喺中國嘅銷售額將會飆升，今年料增加逾兩倍至94億美元，並可能喺明年進一步升至152億美元。
絲絲建議蘋果公司應該盡快嚟香港開番間專門店，必定會受到「粉絲」嘅熱烈支持，分分鐘仲成為中國個人遊嚟香港嘅必去景點。
余絲韻