市場熱線:瑞年有條件開車

本地魚缸繼續反覆,尋日港股先跌、後升、再倒跌63點,收報23,779點,期指今日結算前冇乜啟示。滬綜指尋日反彈1.5%,本來港股如果可以連續兩日先跌後升嘅話,會對孖屐氣氛好有幫助,點知恒指咁快冇力,原來尾市係美元反彈作怪,美匯指數上到78樓上,港匯回落到7.79。美元跌咗咁耐,其實已醞釀反彈,港股啱啱有起色就遇着美元轉強,都算唔好彩。

內地終推出房產稅

不過,沉咗好耐嘅二三線股卒之可以死貓彈,但孖屐主要炒啲跌得太殘嘅落後股,例如被質到半死嘅體育用品股中國動向(03818)以及李寧(02331),但曾經熱炒嘅新材料股就走晒樣,前日已見東岳(00189)同海東清(02228)被質低,尋日輪到思嘉(01863)大跌17%,所以呢排炒股仔要識走位。

祖國再用8招鬥地主,內房股循例跌一跌。今次睇招數好似冇乜新意,二套房貸首期提高到6成根本搔不着癢處,但「限購令」其實影響重大,若然限購都阻止唔到樓價繼續升嘅話,到時會唔會索性「限價」呢?

既然日用品都可限價,樓市限價又有乜咁出奇?鬥地主已鬥到第三回合,而尋晚阿爺又再度出招,分別喺上海同重慶推出房產稅,內房股短期沽壓較大,但過完年可能又係低吸機會。

新股寶峰吼位低吸

祖國亦宣布調低電腦同相機嘅進口稅率,由20%降低到10%,即係對聯想(00992)不利、對偉仕(00856)有利,其實不時有人要求調低奢侈品嘅入口稅,唔使同胞要去到香港同外國掃貨,但中央應該短期唔會咁做。

新股中慧(01143)僅高招股價2.5%,「拖鞋王」寶峰(01121)以接近下限定價,但暗盤只係微升,古勝反而覺得呢隻可以留意,唔係叫人追入,而係睇吓幾時可以低吸。呢類大半隻OEM、細半隻內銷股值幾多錢只係斷估,主要視乎內銷增長有幾快,好似隻好孩子(01086)上市雷聲大、雨點小。

過年要送禮,A股嘅概念股係白酒股,但喺香港如果買銀基(00886)就中招,反而隻瑞年(02010)呢排走勢幾好,早前二三線股小股災都喺6蚊樓下好硬淨,尋日升咗4.5%;間公司舊年九、十月批完舊股批新股,係需要時間消化吓,收夠貨就係反彈之時。

保健品市場潛力厚

煙酒未必個個啱,所以過年送保健品好受歡迎。瑞年產品個名亦似乎為迎合過年送禮,佢嘅廣告口號都係「中國年,送瑞年」,總之過年係佢銷售旺季,股價此時開車亦好正路。瑞年舊年尾嘅訂貨會自己話生意好好,話好過預期,但又冇講實際數額。

至於長線都有得諗,祖國同胞日益富裕,財多自然身子弱,兼且有錢買保健品補吓,而公司已積極研發更多新產品,希望企穩祖國保健品龍頭地位。

戰報

啟帆(00646)+18%

帥哥周三推介啟帆,叫小注跟進,昨日全速啟航,見過0.52元,較其推介時的低位升超過18%。

經緯紡機(00350)+10%

桃桃在一月二十日吼中隻經緯紡機,有新業務發展零舍不同,相對推介低位足足有一成落袋。

古勝

跨媒體地產網新居入伙 幾萬個精選樓盤 歡迎睇樓!

《on.cc東方互動》推出全新購物網站《生活購物》,大量賀年及婚禮用品3折起發售。