喺世界五百強企業中，好多都有設立大學嚟培訓自己嘅員工，成為未來嘅管理階層，其中最出名嘅例子，要數麥當勞嘅漢堡包大學嘞。麥當勞去年喺上海開辦咗首家漢堡包大學，要入讀原來一啲都唔容易，據麥當勞自己講，獲取錄人數嘅比率低過1%，遠低於哈佛嘅7%！
呢家漢堡包大學其實係由香港嘅麥當勞員工培訓中心升格而成，目前使用上海某商業大廈16,846方呎樓面做校園。雖然名為「大學」，但並無泳池、健身室及飯堂，圖書館亦只有一間房咁上下大。據《彭博社》話，5日嘅課程學費要一萬元人民幣，全部由公司支付，其中有啲團隊訓練嘅課程一次只收8個學生，但就有成千人申請。
內地漢堡包大學嘅目標，係要喺二○一四年底前訓練4,000名管理階層。有專門研究連鎖快餐業嘅分析員話，麥當勞咁努力做培訓，其實係為咗喺內地擴張，搶番以前失去咗嘅市場。
據估計，另一家五百強企業Yum! Brands旗下嘅肯德基及必勝客，喺內地合共有3,700間餐廳，喺同行中嘅市場佔有率達40%，反觀麥當勞只有1,300間餐廳，市佔率只係16%。究竟呢場麥當勞叔叔大戰肯德基叔叔邊個會贏，可穩坐中國一哥嘅寶座呢？真係要拭目以待。
余絲韻