農曆新年臨近，個個打工仔最關心嘅當然係有冇人工加及有冇花紅，尋日恒隆地產（00101）董事長陳啟宗（Ronnie）及董事總經理陳南祿（Philip）齊齊向員工報喜訊，話除咗有第13個月糧及年終花紅外，仲會額外派2,000蚊特別花紅以獎勵員工嘅辛勞，等大家可以過一個「肥年」，而且今年仲會加薪4.5%，認真皆大歡喜。
至於新年願望，Ronnie就話希望今年唔好好似去年咁辛苦，可以瞓多啲，因為去年忙住要搵人頂替前董事總經理袁偉良個位，好彩最後搵到Philip嚟幫手。問佢對於Philip表現嘅評價，佢形容話「好勁」，而Philip亦表達嚟咗恒隆半年幾嘅感受，回敬咗一句「感覺極好」。
雖然恒隆喺去年九月慶祝50周年，但Ronnie話唔好以為恒隆係「老人家」，其實恒隆係一個「妙齡少女」，未來10年仲係恒隆嘅黃金時期，充滿盼望。當然佢亦唔抹殺恒隆喺六十年代時亦相當輝煌，去年慶祝集團50周年時，公司仲專登邀請咗喺世界各地嘅公司功臣一齊返嚟慶祝。
余絲韻