中石油（00857）為全球最大企業之一，剛啱公布嘅去年全球能源企業市值五十大名單，佢哋當然榜上有名，不過被美國嘅埃克森美孚石油迎頭趕上，未能蟬聯首位，只係以市值3,030億美元屈居第二，失去全球第一大能源公司嘅寶座，最主要原因係中石油A股上市以來，3年股價累跌76%。
同行如敵國，中國嘅中石油及美國嘅埃克森美孚喺全球能源榜上爭個你死我活，埃克森美孚去年市值較○九年升7%至3,690億美元，稱霸全球。反而A股「石化雙雄」去年市值就大縮水，中石油A股股價下跌16%，中石化股價跌幅更達43%，令到中石化市值排名由○九年嘅第7位，跌出十大至第11位。
中石油A股喺○七年十一月上市，股價喺高峰期見過48.62元人民幣，尋日收市只報11.22元人民幣，跌幅約77%。想當年中石油A股上市時，有唔少投資者爭住買，佢哋嘅總市值曾高達11,081億美元，更一舉超越全球市值最大公司埃克森美孚。
雖然石油價格不斷上升，但中石油股價就唔見咗一大截，所以有股民戲言「人生能有幾多愁，恰似滿倉中石油。」
余絲韻