市場熱線：中聯重科快高長大

A股患加息恐懼症

指數股挾上自然被懷疑同今日期指結算有關，但其實近三個月只係上落市而非單邊市，但呢類市況亦好易令散戶進退失據，而G2兩極發展亦令人好迷惑，美股好似攞咗免死金牌咁款，A股尋日升但仍係反覆偏軟，逢親周五都患上加息恐懼症，尤其聽日係「長假前最後一個周末」，風險特別高。

連概念股呢輪都行唔通，所謂黃金周炒零售股、天氣凍炒波司登（03998）、過年送禮炒銀基（00886），原來只係適用於市好之時。不過，尋日難得搵到三類股集體上升：鋼鐵、汽車同飛機，但可能只係技術反彈性質，除咗鋼價上升但有價冇市之外，其他都冇乜新聞。

車股當中又有隻比亞迪（01211）特別衰，電動車到依家都係止於概念，買車求方便，叉電咁麻煩（除非自家有車房），要環保不如唔好揸。其他車股當然要睇一月份賣車成績，乜嘢優惠都取消晒之後究竟係點？會喺放完農曆新年假後揭盅。

飛機股適宜炒上落

飛機股呢排享受人仔升值同油價下跌兩個利好因素，高鐵係長遠威脅而非短線危機，古勝認為飛機股今年仍適宜炒上落，行業唔會太好又唔會太差。阿爺再出手提高二套房首期至六成，內房股唔荒有運行。

尋日創新低嘅股票當中，有11隻係半新股，用20幾倍招股，個市一唔掂就玩完，另外，好多半新股上市過咗半年禁售期就炒高批股，散戶見過鬼都怕黑。今日有隻中慧（01143）登場，聽日輪到「拖鞋王」寶峰（01121），呢輪個市唔就，對新股影響最大，但中慧一○年PE只係單位數字兼有「金手指」入飛，細細粒隨時爆冷。

中聯重科（01157）雖亦係半新股，但表現相當唔錯，而且不時見有基金增持。間公司做工程機械，遲吓有徐工機械同三一重工想來香港上市，所以都要做吓樣板。

幾間大行都睇好重型機械股嘅前景，全球龍頭Caterpillar成績表又靚，所以中聯重科都幾硬淨，公司預計舊年淨利潤約43億至45億人仔，同比增長約75.7%至83.9%，計PE其實仲平過龍工（03339）同三一國際（00631）。

積極發展海外市場

中聯重科喺深圳上市已超過十年，舊年先選擇來港上市，目的係話想做到國際知名，揚言話要積極發展海外市場，管理層向內地傳媒話喺一五年收入要突破千億，成為世界頭五強。呢類豪言壯語其實聽唔少，最近有間冷氣機公司都話要成為千億企業，但中聯重科睇落作風幾務實，祖國嘅工程機械技術進步亦好快，有大孖沙真金白銀捧場，應該係寶唔係草！

戰報

保華集團（00498）+14%

古晨於一月二十五日看好保華股價走勢，昨日打入升幅榜，較推介當日的低位足足升逾14%。

比亞迪電子（00285）+10%

小尾於一月十八日睇中比亞迪電子，推介當日最低見4.89元，昨日趁高沽貨者都有一成的利潤。

古勝