去年整體樓市興旺，樓價升兼成交多，住宅樓價已平均升咗近兩成，工商舖物業升幅更達四成，帶挈地產代理生意額創近年新高。絲絲剛收到美聯集團（01200）及美聯工商舖（00459）嘅好消息，佢哋為咗與員工分享去年佳績，向每名中央專業部門及前線文職員工派發最多超過7個月薪金作獎勵，即係最多可以出夠19個月糧。此外，據知另一家大行嘅後勤員工亦獲發最少18個月糧。
與物業成交相關嘅行業，真係食正樓市升浪，唔單只地產代理，絲絲識得好多做樓契嘅律師及做樓宇按揭嘅銀行朋友都話做到冇停手，對年尾花紅好有期望。
講番美聯，佢哋嘅執行董事葉潔儀話今次係「還富於員工」，派發花紅係按上述部門與員工嘅個人表現釐定，最優秀嘅員工全年可獲發逾19個月糧，而平均每位員工可獲約5個月薪金作為花紅。至於香港置業後勤員工平均亦獲發約兩個半月薪金作花紅。
另一家代理亦話去年營業額創新高，全線後勤員工獲最少相等於18個月嘅薪金及花紅，今年仲會加人工，平均加幅約5%。
（余絲韻）