社交網站Facebook早前安排配股，有唔少投資者爭住「入飛」，原來曾經叱咤一時嘅互聯網企業網景（Netscape），其創辦人克拉克（Jim Clark）同樣收到高盛嘅電郵，問佢對於呢批股份有冇興趣，克拉克最終都冇「入飛」，佢仲大爆話高盛「食水深」。
克拉克近日接受《彭博市場》雜誌訪問時，仲好勞氣咁話高盛要收客戶4%嘅配售費及0.5%嘅「開支儲備費」，將來賺到錢仲要分5%利潤畀高盛，佢認為咁嘅收費唔合理，話自己其實幾個月前已經喺另一間行買到Facebook股份，價錢較低之餘亦唔使分紅畀經紀。
克拉克仲話，佢交畀高盛代為投資嘅4億美元，當中大部分早喺○九年六月已經提走咗，原因係投資表現及投資意見都太差。佢舉例話，自己喺○六年八月曾見過「賺錢之神」普爾遜，認為佢打賭次按爆煲嘅計劃好有見地，但高盛嘅經紀當年竟然同佢講，話普爾遜只係「配角」。最後克拉克冇跟隨普爾遜落注，結果當然係賺少好多啦！
最令佢氣頂嘅係，其後美國證交會對高盛銷售按揭證券「Abacus 2007-AC1」展開調查，發現原來高盛與普爾遜關係密切。克拉克話：「佢哋（高盛）只會益自己，同埋收取超高費用，簡真混帳！」
又難怪克拉克咁嬲嘅，因為普爾遜再次以成績證明自己嘅投資眼光，佢旗下嘅基金公司Paulson & Co.近日向客戶報喜，話基金持有嘅花旗股份喺過去18個月賺咗超過10億美元，係投資組合內最賺錢嘅股票，認真唔嘢小！
（余絲韻）