今時今日想買嘢唔一定要出街，有時忙得滯，喺網上都可以搵到又平靚正嘅心水貨品。好似主管中國貿易嘅商務部長陳德銘，最近就喺網上買咗個相機用嘅三腳架，價格比市面平四成幾，商務部長果然係格價高手。
陳德銘一有時間就會與老婆一齊行吓超市、百貨公司，陪老婆之餘又可以考察市場。但講到自己買嘢，佢就自爆鍾意網購，由平時食慣嘅南方食品以至送畀太座嘅生日禮物，佢都會喺網上搵。
尋日佢接受訪問時話，佢有淘寶網購物帳戶，亦會喺嗰度買嘢，但一定會格價。點解部長鍾意網購？因為同一樣商品，網上賣嘅價錢平好多囉，好似同一部影碟機，網上嘅價錢就較京城嘅家電售賣場平40%。其實部長與大眾一樣會享受購物樂，最過癮嘅就梗係殺價喇！
余絲韻