「股神」巴菲特與《華盛頓郵報》嘅關係可謂源遠流長，過去37年長期擔任該報董事，日理萬機嘅佢因擔心自己分身不暇，終決定喺五月任期屆滿後唔再續任，不過就講明手持嘅《華盛頓郵報》股份一股都唔會賣，以示對呢份報章嘅熱愛從未退卻。
曾一度兼任19家企業董事嘅巴菲特解釋話，早幾年佢已經想卸下所有董事職務，當中最放唔低嘅就係《華盛頓郵報》，但由於其投資旗艦巴郡業務愈嚟愈複雜，所消耗嘅時間亦愈嚟愈多，終要作出選擇。據美國證交會（SEC）資料顯示，巴郡截至去年底持有《華盛頓郵報》20.5%股權，係該報最大股東，持股現值約7.3億美元。
巴菲特咁重視《華盛頓郵報》，最大原因當然係因為佢年少時曾經做過呢份報章嘅派報員，佢估計經自己手派送嘅《華盛頓郵報》多達50萬份，仲話自己由嗰時開始愛上呢份報章，熱情至今仍未退卻，故只要該報有任何需要，佢隨時都會出手襄助，更打趣咁話該報管理層可繼續徵詢其意見，但就可慳番筆7.5萬美元嘅董事薪酬喎。
另一方面，喺巴郡旗下汽車保險公司Geico工作超過31年嘅選股專家辛普森，辭職後孖住老婆自立門戶，成立顧問公司SQ Advisors，專幫屋企人、朋友及慈善團體管理資產。巴菲特曾經喺○四年致股東嘅信函盛讚辛普森選股眼光奇佳，自八○年以來每年嘅平均回報達20%，跑贏標指嘅14%回報。現年74歲嘅辛普森話，成立新公司主要目的係避免退休生活過於無聊，但唔肯評論巴菲特會唔會搵佢投資。
余絲韻