絲絲講場：南山人壽買家「惹火」
AIG要賣南山人壽，喺台灣梗係矚目，皆因關乎400萬客戶嘅權益以及幾千名員工嘅飯碗。AIG原本想喺去年聖誕節之前公布二次標售嘅新買家，但偏偏拖到本周三（本月十二日），剛啱當日台灣立法院休會，唔通係怕咗班立委？買家潤泰集團總裁尹衍樑話，「查過通勝，嗰日係簽約嘅黃道吉日呀！」
立院休會免爭吵
絲絲都睇過通勝，證實本周三係「宜訂盟」。被美稱為「台灣胡雪巖」嘅尹衍樑，係兩岸當今最「吃得開」嘅紅頂商人，正因為佢有唔少爭議，綠營班立委又點肯收口？尹衍樑私底下承認，拖多三個星期係想揀台灣立法院休會後至公布，咁樣可以減少啲政治口水嘅干預。
睇番AIG賣南山人壽，唔明點解佢哋硬係揀中啲「惹火」買家。上次中策（00235）拍住博智就話人哋係大陸政協、有大陸資金滲透，台灣朝野嘈到拆天；呢次本土財團中標，又畀綠營咬住唔放，猛話有暗盤交易，又有政治介入。最後賣唔賣得成，睇怕AIG要揀個吉日至好遞申請囉。
余絲韻