女士們嘅經濟能力愈嚟愈強已經唔係新鮮事，呢個現象近年喺一向重男輕女嘅中國亦愈見明顯，最近中國百萬富翁中有三分之一係女性，足見中國女性嘅影響力，隨着女強人數目增加，內地消費品市場亦起咗特別變化。
據生產豪華跑車法拉利嘅飛雅特話，喺中國市場買旗下瑪莎拉蒂（Maserati）汽車嘅女性數目係歐洲嘅3倍，而買法拉利嘅女性數目就係全球平均嘅兩倍。
尋日絲絲睇到一篇關於內地女強人買車嘅報道，其中一名建築公司總裁Lily喺兩年前以120萬人仔買咗部保時捷，最近佢又睇中一部阿斯頓馬丁嘅跑車，佢話當揸住部車兜風時總會成為焦點，感覺特別得意，更不諱言話跑車通常係男人嘅世界，女性買跑車只係為咗與男性平起平坐。
另—位搞酒店生意嘅Sarah，佢已經有9部豪華靚車，依家又搵緊新目標。Sarah當年為咗學揸瑪莎拉蒂，瘋狂到親身飛去意大利上堂。至於點解咁鍾意買靚車，佢話依家女士承擔咗好多男士嘅工作，做嘢好辛苦，希望透過物質獎勵吓自己喎！
余絲韻