金融徐筆:阿里巴巴藉購併擴展

星期二喺本欄寫話24,000點一破在望,又開口中,多謝各粉絲繼續支持,都係嗰句,繼續不眠不休為大家「好稿獻給你」。

和黃(00013)由一一年頭80元,短短7個交易日,嚟個鳳翼天翔,一飛上90元之上,好嘢!如果大家唔善忘,筆者推介過和黃價內證(25145),已經有100%回報,都咪話唔犀利。

呢兩日,都係時候到老牌大笨象(00005)同牛三必起嘅中移(00941)雙龍出海。所以大家要睇清楚炒股唔炒市真係一一年嘅大主題,千祈唔好掉以輕心,如果唔係自己一定係最傷身,記住無?照當前走勢,恒指都開始初現鳳爪,大家都可以繼續留意。

今年,科網股巨頭阿里巴巴(01688)以超過15%嘅大躍進式升幅紅盤高開,唔難預見一一年將會係科網股豐收嘅一年。

冀鞏固龍頭地位

較早前有市場消息傳出,工信部等政府機關起草嘅「十二五」電子商務規劃中將定下目標,要喺二○一五年將互聯網上嘅交易額翻兩番,凸顯咗中央對發展網上商貿嘅決心。

為把握相關機遇,阿里巴巴最近亦非常積極咁擴展業務。喺過去16個月,集團總共進行咗五項收購活動,冀進一步鞏固自己嘅龍頭地位,當中最受到市場關注嘅,可以話係收購內地一站式出口服務供應商深圳市一達通企業服務。

透過收購一達通,阿里巴巴嘅商業模式將會變得更加完整,將通關、物流同金融更進一步地貫通起來,將佢收入來源由「資訊服務」拓展至「交易環節服務」,具有重要戰略價值。繼續追蹤,出發!

香港大學電子金融服務榮譽助理教授 徐燦傑

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率