證監會行政總裁韋奕禮今個夏天就同大家講拜拜，政府將成立遴選小組全球招聘繼任人，一場「估領袖」遊戲又開始咗。「股壇大姐大」蔡陳葆心早前公開話港交所（00388）前行政總裁周文耀係合適嘅繼任人選，有中環資深「賓卡」就「打蛇隨棍上」，開玩笑咁話周文耀未必肯做證監會嘅CEO，搵佢做主席兼搵狄勤思做CEO好似更合理喎！
呢位「賓卡」話，證監會主席屬非執行，唔使理日常事務，個位又有面子，啱晒已退休嘅周文耀。至於證監會CEO呢個位，大家都知幾難搵人做，尤其係依家距離夏天只有不足半年時間，喺芸芸人選中，既熟悉證監會大小事務又以香港為家，現任港交所上市科主管狄勤思肯定係其中一個理想人選，佢加入港交所前喺證監會做過多年，差唔多證監會每個範疇都涉獵過，絕對係經驗豐富。
當然上述所講嘅都係市場人士揣測，搵繼任人選目前仍言之過早，事關政府仲要進行全球招聘，呢個動作有排搞，分分鐘韋奕禮走咗都未有人選，由代CEO頂檔都得架！
「賓卡」提醒，依家反而應關注現任證監會副行政總裁張灼華喺下月底約滿後嘅動向，事關佢一旦續約，就自然係CEO繼任人選之一。巧合嘅係，證監會主席方正喺今年十月又任期屆滿，佢哋今年嘅人事變動肯定係絲絲「關注」嘅項目之一！
余絲韻