市場熱線：中石化長短線皆宜

早兩日已見二至九線股跟唔上，尋日更係下跌股數多過上升。巴克萊加入唱好大笨象可以重見「紅底」，恒指可唔可以上二萬五都靠晒佢，「歐豬」單嘢已拋諸腦後，「雙牙」係好強防線唔可以失陷，港股應可朝住新高進發。

優惠及補貼最實際

祖國話會出招鼓勵軟件業同IC產業，搞到尋日港股升幅榜大部分都係軟件股，反而IC股得隻細粒嘅華潤微電子（00597）有似樣嘅升幅。

老實講，祖國年年都話支持科技行業，皆因想產業升級就要靠科技，而呢樣係明顯輸蝕畀其他先進國家。講到國策支持，最實惠莫如稅務優惠同研發補貼，減稅一早已推行緊，而補貼就涉及好多偷呃騙嘅嘢，啱啱公仔箱先播過「漢芯一號」造假經過。

另外幾個措施都有建設性，但科技屬於高風險又冇資產抵押，你叫銀行憑乜嘢信你？不如搞創投基金，話明高風險高回報；而喺大學大搞人才培訓，係長遠之計；至於保護知識產權，賊喊捉賊？

物聯網概念等落鑊

尋日軟件股升到花多眼亂，當然好多係博大霧性質，龍頭股金蝶（00268）早兩日古勝話唔明佢點解咁勁，依家先恍然大悟。而軟件同IC之外，國策支持下一輪重頭戲早已傳係物聯網，隻概念股中國安芯（01149）尋日湊熱鬧亦升4.7%，自從批股後又不斷創新高，應該仲有睇頭。

龍昌（00348）同海航單deal喎咗，奇在公布前兩日抽高有引人落疊之嫌，但尋日隻股仍守得住3毫子，唔知有乜後着。原來早幾日海航旗下嘅大新華航空已公布今年喺香港上市嘅計劃，依家放棄借殼龍昌上市，相信唔係時間上巧合咁簡單。

重汽（03808）承認旗下公司涉及一單5億人仔偽票案，但尋日反而上升，唔通誠實有獎？其實間公司市值成200億，就算追唔返嗰5億都只係佔2.5%，唔影響公司營運就冇問題。

古勝喺月初推介過中石化（00386），隻股跟住表現唔錯，皆因油價近排升多跌少，根據成品油定價機制，又到加成品油價嘅時候。ABC選擇題：加、唔加、遲啲加，以祖國作風，遲啲加嘅機會最大，問題係會唔會拖到農曆新年之後。

成品油機制勢改革

中石化短線可博成品油價調整，長線計8倍PE，上升空間肯定大過下跌空間，另外，舊年尾吹得好勁嘅新成品油定價機制遲遲未出台，但改革嘅呼聲好高。媒體早前舉出廣東汽油批發價下跌，但零售價上升嘅例子，盞益咗加油站可賺取每噸千幾蚊嘅利潤，遠遠高過官方設定嘅300蚊盈利空間。所以「22日、4%」遲早改制，支持中石化股價再升多咗一個理由，在下同時將佢嘅目標價同止蝕價調高。

戰報

中國海景（08065）+12%

詩詩周三認為中國海景大有向上空間，推介時低位只有0.8元，昨日高見0.9元，升幅達12.5%。

中國太保（02601）+12%

小尾於上月二十九日指太保股價近日呈強勢，昨高見34.25元，較推介低位30.45元，累升12.4%。

古勝