絲絲講場：滙豐豬仔錢罌比賽頒獎
踏入高科技電子時代，好多兒時習慣都冇咗，依家只有少數家長仲會用豬仔錢罌嚟教小朋友儲零用錢嘅習慣。為咗延續呢個優良傳統，滙豐銀行搞咗一個《小錢罌、大夢想》豬仔錢罌設計比賽，收到超過5,000份參賽作品。
「牛記豬仔」贏冠軍
滙豐尋日舉行頒獎禮，冠軍係8歲小朋友嘅作品，話說佢創作時着住條「牛記」，所以隻豬仔都係着「牛記」，就係呢條「牛記」，為呢位小妹妹贏得一個有5,000蚊獎學金嘅滙豐兒童儲蓄戶口。滙豐亞太區個人理財業務總監鄭蔚彤亦玩埋一份，親自設計「愛與和平」嘅錢罌，喺白色豬仔錢罌上貼滿五顏六色嘅閃石。
獲得滙豐香港區個人理財業務主管麥倩華青睞嘅係「豬豬變身記」嘅「獅子豬仔錢罌」，唔知係咪睇中佢與公司暱稱「獅子行」相似呢？「牛記豬仔」及其他29件傑出作品嘅巨型複製品，將分別喺滙豐總行、銅鑼灣百德新街及黃埔新天地聚寶坊展出，大家想緬懷小時候嘅儲蓄情懷，不妨去影番張相。
余絲韻