國美（00493）股權爭奪戰結束，係時候收拾心情搞番好盤生意，大股東黃光裕嘅親信鄒曉春首度以國美身份出席國美供應商大會，當然亦唔少得主席陳曉，佢喺會上提出國美嘅5年計劃，不過鄒曉春只係到場打氣，未有發言。據聞黃光裕老婆杜鵑即將重出江湖，喺下周出席北京國美體育用品公司記招，絲絲印象中，今次係杜鵑喺國美股權爭奪戰後首度亮相公開場合。
鄒曉春出席呢次活動，反映佢已加入國美團隊，絲絲聽內地朋友講，喺會上國美預期今年全年銷售規模複合增長達25%以上，未來5年平均增長達15%。陳曉早前傳出離職，佢喺會上反而轉趨低調，只係講吓國美發展電子商務、提升單店效益等大方向嘅銷售策略。不過，鄒、陳二人同場已經成為大眾嘅焦點。
另一焦點係杜鵑重出江湖，自從杜鵑被判緩期3年後，佢嘅行蹤備受關注，佢接管黃光裕嘅產業，又傳出佢會出面幫手奪回國美股權，今次杜鵑會與黃光裕妹妹黃秀虹出席下周嘅國美體育用品公司記招，講吓國美體育用品嘅戰略，作為體育用品市場嘅初哥，杜鵑現身支持，到時肯定吸引好多傳媒到場。
余絲韻