市場熱線：鞍鋼龍頭先起動

港股上升主要多得兩樣嘢：「歐豬」危機紓緩同美國錢莊計劃增加派息，歐豬危機果然暫時大步檻過，賣債息率低過預期，有歐盟、中國同日本打救，為己為人，使乜驚喎！而美國錢莊股上升亦帶挈咗大笨象（00005），花旗出埋報告話睇103蚊，大笨象急升3.7%帶起個魚缸，連祖國移動（00941）都升1.82%，但藍籌上升初期會「炒大唔炒細」，所以二三線股亦跑慢幾步。

恒指咁勁，但睇SDI，細摩由除夕開始做咗大沽家，唔通大戶沽貨真係愈沽愈高？但細摩揸住最多嘅中建材（03323）最離奇，成日增增減減，有時低位減持、高位增持，跟佢玩呢隻多數輸錢。

孖屐炒作氣氛好

「女股神」曾預言個市會調整到過年前，暫時就跌眼鏡，但佢冇改變睇法，話到三月中至睇得清楚方向。

尋日升得最高興嘅係航運股同碼頭股，祖國十二月份出口好似升幅大為放緩，但其實創咗歷史新高，另一方面昆士蘭洪災搞到BDI跌到1,500點，破咗舊年嘅低位，兩個因素一正一負，但乜嘢消息都假，最緊要孖屐氣氛好。

另外一樣睇孖屐氣氛嘅係公司成績表，如果氣氛唔就，成績好反而成為趁好消息出貨藉口，香港業績期可能要等到三、四月，但呢排開始陸續發盈喜或盈警，好多股其實舊年賺多咗係人都知，但發盈喜之後例牌有得升，例如航空股、神冠（00829）等。

拉鏈新股開易（02011）只係微升，今日到友川（01323）登場，隻股初時話造圍裙，後來話造膠袋，最後概括為「一次性醫療用品」，即係「用完即棄」，大家唔好咁長情。

享更佳成本優勢

呢兩日雖然氣氛好轉，但除咗碼頭股之外，大部分板塊都升得好短癮，所以玩落後股始終較合值博率。

舊年最落後嗰幾類股：內房股同航運股已翻生，電力股因為煤電「不」聯動嘅關係仲未有起色，鋼鐵股雖然亦受煤價影響，但起碼可以加鋼價將成本轉嫁，繼寶鋼今個月加價之後，武鋼下個月亦帶頭加價，每噸加約100人仔，鋼材連加兩個月，鋼鐵股有機會搭一程順風車。

買鋼股不外4隻，首國（00697）一向最有炒味，相反重鋼（01053）長期唔郁，馬鋼（00323）樣樣排中間，鞍鋼（00347）就一直最貴，H股貴過A股3成，但其實貴得有道理，因為佢嘅鋼材質素同成本優勢都好過同行，阿媽夠大件會受惠於鋼鐵業購併重組，反彈先買龍頭股係正路。

戰報

上海石化（00338）+27%

帥哥上月二十九日指上石可受惠上調成品油價，昨高見4.96元，較推介時低位3.88元升27.8%。

第一視頻（00082）+10%

詩詩上月三十日指第一視頻手機遊戲業務前景俏，當日低位2.38元，昨高見2.62元，升逾一成。

古勝